जग्गासँग जोडिएका ४२ हजार मुद्दा फर्स्यौट हुन बाँकी

काठमाडौं । जग्गासँग जोडिएका विभिन्‍न प्रकारका ४२ हजार २५० मुद्दाहरु फर्स्यौट हुन बाँकी रहेको महालेखापरिक्षकको ५९औं प्रतिवेदनले देखाएको छ ।

आर्थिक वर्ष ०७७/७८ मा विभिन्‍न मालपोत कार्यालयमा रहेका २३ हजार ८८१ मुद्दा फर्स्यौट भएका थिए ।

मोहीको लगत कट्टासम्बन्धी बाँडफाँट, छोडपत्र, जग्गा छोडेको, अदालतको फैसला र अन्यसमेत गरी २१ भूमिसुधार तथा मालपोत कार्यालयमा रहेका ३८ हजार ६५४ मुद्दामध्ये १५ हजार ४६५ फर्स्यौट भई २३ हजार १८० मुद्दा फर्स्यौट हुन बाँकी रहेका छन् ।

त्यस्तै, मोही कायम, मोही नामसारी, मोही प्रमाणपत्र, मोही निष्काशन लगायत विषयमा आव ०७७/७८ सम्म २७ हजार ४८६ मुद्दा दर्ता रहेकोमा यो वर्ष ८ हजार ४१६ मुद्दा फर्स्यौट भई १९ हजार ७० मुद्दा फर्स्यौट गर्न बाँकी रहेको महालेखाले जनाएको छ ।

‘मुद्दा फर्स्यौट कार्यमा क्षमता वृद्धि गरी सेवा प्रवाह थप प्रभावकारी बनाउनुपर्ने देखिएको छ’ महालेखाको प्रतिवेदनमा भनिएको छ ।